Óli lætur ekki deigið síga í eldhúsinu heldur snarar fram hverju hnossgætinu á fætur öðru.

Hann hefur verið upptekinn við eldavélina og nú síðast varð úr dýrindis Bingókaka, terta með kremi og extra bingókúlum sem Davíð Birgisson, vinur Óla, segir að sé „klikkað góð“.

Þrír glaðlegir piltar príða kökuna, þeir Gísli, Eiríkur og Helgi.

Opið hús verður hjá Óla í dag þar sem hann gefur smakk og sérrídropa.

Ólafur B. Sigurðsson, leikmaður KV, er mikið jólabarn og segist baka mikið fyrir jólin. Fréttamaður síðunnar rann á lyktina í gærkvöldi á gönguferð sinni um Vesturbæinn og var að sjálfsögðu boðið inn.

„Þetta eru Bailey’s kökur!“ sagði Ólafur kampakátur en hann segist hafa það sem reglu að skilja alltaf eftir kökur á eldhúsborðinu fyrir Stekkjastaur til að fagna komu fyrsta jólasveinsins til byggða. „En ég lýg því ekki að ég fæ mér nokkrar“ bætti hann svo við sposkur á svip.

Við báðum Óla um að deila með okkur uppskriftinni:

Hráefni: 

1/4 bolli af Bailey’s Irish Cream
1 Matskeið smjör
350 gr. súkkulaði
2 eggjarauður
1/4 bolli rjómi

Bræðið súkkulaðið, Bailey’sið og rjómann saman við lágan hita. Hrærið loks rauðurnar, eina í einu, út í. Þegar þetta er orðið vel blandað bætið þið smjörinu út í og hrærið duglega.

Hendið þessu í ísskápinn yfir nótt þar til þetta verður hart og gott. Notið þá skeið til að gera litlar kúlur úr deginu, rúllið þeim upp úr flórsykri, kakói, söxuðum hnetum eða annars konar skrauti eftir óskum.

Betra en kynlíf.

Í matarhorninu að þessu sinni eru það formaður og framkvæmdastjóri sem fara yfir það hvernig almennileg bernaise sósa er útbúin.

Hráefni:
6 eggjarauður
500 gr smjör
3-4 msk hvítvíns edik
1 msk etragon
Svartur pipar
Karrý á hnífsoddi
Paprikuduft á hnífsoddi
½ msk Dijon sinnep
Kjötkraftur ef með þarf

Látið smjörið bráðna í rólegheitum við vægan hita. Passið að hræra ekki í smjörinu því að ætlunin er að fleyta fituna ofan af grogginu/mjólkinni sem myndast í botninum, seinna meir. Eggjarauðurnar eru þeyttar vel saman ásamt ediki og kryddi, yfir heitu vatnsbaði. Varist að láta eggjarauðurnar hitna um of. Hræran verður að vera ljós og létt. Takið af vatnsbaðinu og hrærið stöðugt í á meðan smjörinu er hellt saman við, smátt og smátt. Það gæti þurft að setja matskeið og matskeið af volgu vatni ef hræran verður of þykk. Kryddið til ef með þarf.

Í matarhorni Óla að þessu sinni er ein hans þekktasta uppskrift: heslihnetukökur. Þurkið munnvikin, þessi er svakaleg.

Hráefni:
1 poki Betty Crocker hnetusmjörs kökumix
3 matskeiðar bráðið smjör
1 egg
5 matskeiðar mjólk
1 bolli heslihnetusúkkulaðismjör
1 bolli flórsykur
Hálfur bolli saxaðar salthnetur

Hitið ofninn í 180 gráður. Blandið saman í skál kökumixinu, bráðna smjörinu, egginu og einni matskeið af mjólk. Látið þetta svo bíða.

Í minni skál blandið þið svo vandlega saman heslihnetusmjörinu og flórsykrinum. Rúllið helming svo saman í 5 litlar kúlur, fínt að nota matskeið.

Nú takið þið kökudeigið sem þið gerðuð fyrst og gerið litlar flatar klessur. Gerið dæld í miðjar kökurnar. Setjið litlu kúlurnar inn í dældina og lokið fyrir með kökudeiginu (kúlurnar eiga að vera inni í deiginu). Skellið þessu á smjörpappír og inn í ofn með þetta í ca. 11-13 mínútur eða þar til þið sjáið að kökurnar eru orðnar fallega brúnar.

Nú hrærið þið restinni af heslihnetusmjörmixinu saman við fjórar matskeiðar af mjólk þar og hellið yfir kökurnar. Troðið svo söxuðu salthnetunum ofan á. Gefið þessu svo smá tíma til að harðna.

Væsgú!

Í matarhorni Óla Bingókúlu að þessu sinni tekur þessi þekkti lífskúnstner fyrir ofnotkun á kryddi. Gefum honum orðið.

Það er ekki fyrr en á síðustu einum til tveimur áratugum að Íslendingar hafa fengið almennilegan aðgang að góðu hráefni til eldamennsku. Því er það enn nokkuð ríkt í landanum að krydda vel, sjóða lengi og grípa til annarra húsráða til að slá á helsta ýldubragðið.

En þegar elduð er dýrindis nautalund, svo við tölum nú ekki um lambakótilettur, er mikilvægt að við höfum í huga að góð steik þarf ekki mikið krydd. Förum frekar rólega í þetta, nuddum Maldon salti og svörtum pipar varlega í steikina til að byrja með og smökkum svo áður en við bætum við. Munum svo að sósur og annað meðlæti er oft og tíðum nokkuð salt, sem dregur enn frekar úr þörfinni á að krydda steikina vel.

Auk þessa er mikilvægt að velja vínið vel. Sumt vín er svo rammsterkt að það dregur úr upptöku bragðlaukanna á söltum efnum. Því mæli ég frekar með því að þið hellið tiltölulega mildu víni í glös meðan þið gæðið ykkur á kjötinu en geymið þau sterkari til ostanna á eftir.

Og svo ég vitni nú í gamlan meistara:

Sat ég við diskinn sem ormur á gulli
svangur og klár í að borða á mig gat
en heldurðu að helvítis kellingin sulli
á steikina helvítis arómat!