KFR lék sinn fyrsta leik í 2. deild þegar liðið sótti Vesturbæinga heim. Liðin fóru saman upp úr 3. deild síðasta haust, en KV hafði betur í úrslitaleiknum.

Heimamenn náðu strax undirtökum í leiknum en Rangæingar pressuðu hátt og spiluðu fastan og hraðan fótbolta þegar færi gafst til. Fyrri hálfleikur var nokkuð tíðindalítill, eða þar til Hreinn Bergs, sóknarmaður KV, skallaði boltann í netið eftir hornspyrnu. 1-0 var staðan í halfleik sem endurspeglaði nokkuð vel fyrri hálfleikinn.

Fljótlega varð þó ljóst í hvað stefndi í síðari hálfleik, þar sem Vesturbæingar réðu lögum og lofum. Helgi Ármannsson og Andrezej Jakimczvk voru sprækir í liði heimamanna en náðu ekki að ógna að ráði. Strax á fimmtu mínútu síðari hálfleiks prjónaði Einar Már Þórisson sig milli tveggja varnarmanna KFR og var felldur. Davíð Birgisson skoraði örugglega úr vítinu og kom KV í 2-0. Nokkru síðar skoraði Brynjar Orri Bjarnason fínt mark fyrir heimamenn sem flautað var af vegna rangstöðu. Á síðustu 10 mínútum leiksins var svo komið að þætti Jóns Kára Eldon, sem lék aftarlega á miðju KV. Hann skoraði tvö mörk úr aukaspyrnum, af nánast sama færi, bæði niðri í nærhornið og kom Maciej Majewski engum vörnum við. Virkilega fallega mörk hjá Jóni Kára og hann innsiglaði þar með 4-0 sigur heimamanna.

Fyrir leik fékk Guðmundur Pétur Sigurðsson, hægri bakvörður KV, viðurkenningu frá stjórn félagsins, en hann lék sinn 100. leik fyrir félagið.

Við unnum nú í kvöld ágætan 3-2 sigur á Aftureldingu er kom í heimsókn í Frostaskjólin. Strax í upphafi leiks fengum við tvö ákjósanleg marktækifæri. Fyrst skaut Óli Már yfir úr teignum og þá vippaði Dabbi yfir markvörðinn sem og markið er hann slapp inn fyrir.

Um miðjan fyrri hálfleiks skoraði Dabbi örugglega úr vítaspyrnu eftir að Einar Bjarni féll í teignum eftir viðskipti við markvörðinn. Ágætur dómari leiksins, Oddur Helgi, var ekki í nokkrum vafa með ákvörðun sína, er var rétt.

Leikar stóðu 1-0 í hálfleik.

Gunni bætti við öðru marki okkar manna snemma í síðari hálfleik. Í kjölfarið gerðum við nokkra breytingar á liðinu en alls léku 17 leikmenn með í kvöld.

Við það riðlaðist nokkuð okkar leikur og gestirnir gengu á lagið. Þeir jöfnuðu svo leikinn 2-2 með tveimur sjálfsmörkum okkar manna. Áður hafði Danni varið vel vítaspyrnu.

Eftir jöfnunarmarkið tókum við öll völd á vellinum og Kalli tryggði okkur sigurinn með hælnum eftir hornspyrnu Dabba.

Óhætt er að segja að úrslit leiksins hafi verið sanngjörn. Við fengum ógrynni marktækifæra og þá aðallega þeir Dabbi og Gunni. Næsti leikur er svo á miðvikudaginn kemur á móti 2. fl. KR og svo annan laugardag fáum við Reyni Sandgerði í heimsókn.

Byrjunarlið KV (4-2-3-1): Danni – Maggi, Danni, Halldór Boga, Atli – Einar, Aron – Valdi, Dabbi, Óli Már – Gunni.

Varamenn: Óli Þór, Kalli, Gonni, Ingvar, Tihomir, Gummi.

KV lék í dag sinn fyrsta æfingaleik á undirbúningstímabilinu. Mótherjarnir voru strákarnir í U-17 ára landsliðinu, sem eru að undirbúa sig fyrir mikilvæga milliriðla og hafa staðið sig afar vel.

Ungir, sprækir og mjög vel spilandi landsliðsmennirnir komust snemma leiks í 2-0 og þannig stóðu leikar í hálfleik, en Gunnar Kristjáns hafði þá í tvígang átt skot í slá og bjargað var frá Davíð Birgis af línu.

Strax í upphafi skoraði Hreinn Bergs glæsilegt mark með lúmsku skoti fyrir utan teig í stöngina og inn. Hann lagði svo upp mark hjá Gunnari Kristjáns áður en hann kom KV í 3-2 með vippu yfir markmanninn eftir frábæra sendingu frá Einari Bjarna.

Mörkin hefðu getað orðið fleiri frá KV, en Ólafur Sigurðsson var óheppinn þegar hann skaut í stöng úr þröngu færi og svo fram hjá úr ákjósanlegu færi seint í leiknum. U-17 náði hins vegar að jafna á lokamínútunni eftir góðan sprett að endalínu, en varnarmenn KV náðu ekki að verjast fyrirgjöf inn í markteig.

Nokkrir leikmenn léku sinn fyrsta leik fyrir félagið, Guðmundur, Einar Bjarni, Gunnar, Jón Kári og Atli.

Áhorfendur fengu heldur betur flugeldasýningu í brakandi blíðu á KV Park í dag. KV tók þar á móti Magna í fyrri úrslitaleik liðanna um sæti í 2. deild, en um dómgæslu sá sama tríó og dæmir leik Skotlands og Litháens í næstu viku.

Davíð Birgis átti gott færi í upphafi leiks sem var varið og skömmu síðar komst Brynjar Orri einn á móti markmanni gestanna sem varði út í teig. Þar kom Valdemar Ásbjörnsson askvaðandi og lagði boltann í netið. Brynjar, sem átti stjörnuleik, kom sér í fleiri færi sem báru loks ávöxt þegar hann kom KV í 2-0. Enn stutt liðið af leiknum og staðan varð 3-0 eftir um korters leik þegar Aron skoraði úr vítaspyrnu eftir að markvörður Magna braut á Hreini Bergs innan teigs.

Vesturbæingar bættu einu marki við fyrir lok fyrri hálfleiks þegar Davíð Birgisson hafði sólað markmanninn sem braut á honum, en Davíð kláraði spyrnuna sjálfur. Markmaðurinn þar heppinn að fjúka ekki út af. Staðan því 4-0 í hálfleik og spilamennska KV til fyrirmyndar.

Í síðari hálfleik bætti Davíð við sínu öðru marki snyrtilega áður en hann gekk frá sinni fyrstu þrennu fyrir félagið með vítaspyrnu. Örn Arnaldsson fékk frábært tækifæri til að koma KV í 7-0 þegar hann skaut fram hjá eftir að hafa farið fram hjá markmanninum en sjöunda markið kom loks þegar Skúli „rauði“ Jónsson setti boltann í nærhornið með góðu skoti fyrir utan teig. Gestirnir minnkuðu muninn í 7-1 fyrir leikslok og þannig urðu lokatölur.

Frábær leikur í Vesturbænum fyrir framan á annað hundrað áhorfenda sem skemmtu sér prýðilega. Síðari leikur liðanna verður á miðvikudaginn á Grenivík og þar getur KV tryggt sig beint aftur upp í 2. deild.

Davíð átti góðan leik að venju og skoraði þrjú mörk
Viðtal við Davíð á fotbolti.net

Góður sigur vannst í fyrri leiknum við Augnablik í dag. Það voru Aron og Valde sem skoruðu mörk KV. Egill S. Ólafsson meiddist í fyrri hálfleik og þegar svartur doritos og malt í gleri hafði ekkert að segja fór Arnar Smárason með hann upp á sjúkrahús. Við sendum honum okkar bestu kveðjur og óskum honum fljóts bata. Auk þess biður Auðunn guð að gefa að Egill jafni sig fyrir miðvikudaginn.

Næsta æfing verður á sunnudag kl. 18:00.